٤٠ فەرموودە بۆ قورئان خوێنان

بـەناوی خـودای بەخشندەی میهرەبان بێگومان قورئانی پیرۆز ئەم پەرتوکەیە کە لەلایەن خوداوە بۆ پێغەمبەری خۆشەویست ﷺ دابەزیوە ، دوا پەیامی ئاسمانییە ، چاکترین ووتەیە ، نوور و ڕووناکیە بۆ دونیا و دواڕۆژمان ، بەرچاو ڕوونی و ڕێنمویی کارە بۆ بڕواداران ، شیفایە بۆ نەخۆش و دەردەران ، ئارامییە بۆ دڵەکان ، هـەموو شتێکی بە وورد و درشتەوە تێدا ڕوونکراوەتەوە ، هیچ کەم و کوڕییەکی تێدا نییە ، دەستوور و بەرنامە و پەیامی موسڵمانانە ، پڕیەتی لە خێر و پاداشت بۆ ئەوانەی دەیخوێنن و کار و حوکمی پێدەکەن ، بەدڵنیایی هەر کەسێ بیخوێنێ و کاری پێ بکات ، پلە و پێگەی بەرز دەبێت و سەرکەوتوو و خۆشەویست دەبێت لە لایەن خودا و خەڵکیدا ، بە شێوەیەکی گشتی بەرچاو ڕوون دەبێت لەژیاندا . لەم نامیلکەیەدا : چل فەرموودەی پێغەمبەری خۆشەویستمان ﷺ دەربارەی قورئانی پیرۆز هێناوە ، بێگومان ئەم فەرموودانەی دەربارەی قورئانی پیرۆز هاتوون ، یەکجار زۆرن ، بەڵام تەنها چل فەرموودەم لێیان هەڵبژاردووە ، لە هەموو بابەتانەی کە پەیوەستن بە قورئانی پیرۆزەوە ، تا من و تۆی قورئانخوێن بتوانین لە رێگای ئەم فەرموودە پیرۆزانەی پێغەمبەری خۆشەویست ﷺ وە پەیامەکانیان زیاتر و زۆرتر ئاشنای قورئانی پیرۆز بین ، چونکە قورئانی پیرۆز بۆ پێغەمبەری خۆشەویست ﷺ دابەزیوە ، بێگومان ئەوزۆر باشتر لە ئێمە لە ڕاستی قورئان و پاداشتی قورئان و هەموو شتەکانی تر کە پەیوەستن بە قورئان شارەزاترە ، بۆیە دەبێ ئێمە موسڵمان لە ڕێگەی پێغەمبەری خۆشەویست ﷺ، وە فەرموودەکانی ئاشنای قورئانی پیرۆز بین . لە ڕاستییدا : ئەم فەرموودانەی کە لەم نامیلکەیەدا هێناومن قسەی زۆر هەڵدەگرن ، بەڵام هەوڵمداوە بەکورتی لەسەریان بدوێم تا زۆر درێژ نەبنەوە ، هەر لەبەر ئەم مەبەستەش خۆم لە بۆچوونی جیاوازی نێو زانایان پاراستووە ، تا پەیامی فەرموودەکان بەئاسانی بگات بە خوێنەرانی ئازیز و خۆشەویست . نووسینی: م . نیهاب شهاب محمد

The first version of the ٤٠ فەرموودە بۆ قورئان خوێنان.